مين فينا مبئاش يستخدم جهازه استخدام يومي ويكاد يكون في كل شئ في حياته. بنستخدم اللابتوب في الشغل وفي البيت وفي النادي وحتي في العربية لو مش احنا اللي سايقين. فبدون مقدمات ملهاش لزمة خلينا نسأل نفسنا “ايه اللي يخلي الهاردوير الخاصة بجهازي تدخل في مشاكل ؟”
الحقيقة فيه أسباب كثير بتؤدي لمشاكل كثير في جهازك علي رأسها قفل الجهاز بدون سابق انذار (قطع التيار الكهربائي او نزع البطارية بدون احتياطات) .. لكن خلينا نتكلم عن أكثر أسباب بتعمل مشاكل مع أغلب الناس:
1- عدم تحديث نظام التشغيل للجهاز/مضاد الفيروسات
من أهم الأسباب والمشتركة بين أغلب المستخدمين هو قفل التحديثات الخاصة بنظام التشغيل ومضاد الفيروسات اللي بيأدي بشكل أو بآخر لبطأ الجهاز. التحديثات مبيكنش معناها دائما إصدار أحدث فقط، لكن في الأغلب هي “تحسينات” سواء علي مستوي نظام التشغيل أو أي برامج منصبة علي الجهاز
2- تراكم الأتربة
السبب الأشهر الثاني في قائمتنا ولأنه سبب طبيعي مش بتدخل من المستخدم فمحدش يقدر يختلف عليه. تراكم الأتربة بتأدي لإرتفاع حرارة الجهاز اللي بيؤدي بدوره لتقليل أداءه وعمره الإفتراضي
3- عدم التفكير قبل تحميل الملفات
تحميل ملفات ضارة مش بس هيضر بنظام تشغيلك لكن هيؤدي كمان لشلل/بطئ في أداء جهازك وأحيانا استغلال مصادر الجهاز كاملة لوظيفة معينة مكلف بيها الملف ده
4- تخزين ملفات غير مستخدمة
الفولدر الـ hidden اللي فيه صور البنت اللي كنت بتحبها في ابتدائي وفولدر فيديوهات الدراسة اللي مستحيل تلجأله تاني، كل ده بيؤدي لبطأ في القراءة من نظام التشغيل، مضاد الفيروسات وغيرها وبالتالي تقليل من أداء الجهاز بدون أدني سبب حقيقي
5- تحميل برامج كثيرة أثناء الـ boot
من خلال Task Manager تقدر توصل لـ tab إسمها Startup من خلالها تقدر تقفل كل البرامج اللي مش هتحتاجها وبتحمل لوحدها مع الـ OS Booting
6- مبتقفلش جهازك/مبتعملش restart
اقرأ أكثر عن الموضوع من خلال مقالتنا فائدة إعادة التشغيل (الـ Restart)
7- مبتصلحش مشاكل جهازك
سواء بتبديل قطع غيار معينة أو تحديث التعريفات بشكل دوري
8- التوصيل بشبكات الـ Wi-Fi المجانية
مش معني انه “مجاني” فبالضرورة هيكون مفيد، استخدام شبكة Wi-Fi مفتوحة بيعرضك لخطر سرقة البيانات واستخدام جهازك في أغراض مؤذية من خلال برامج/استخدامات الهاكنج المختلفة
9- عدم تشغيل الحماية الكافية لجهازك
إستخدام كلمة سر 123456 أو عدم تنصيب مضاد فيروسات هيؤدي مع الوقت لمشاكل كبيرة بدورها هتأدي لبطئ في الأداء الكلي لجهازك. لو انت بتستخدم MS Windows ممكن مثلا تستخدم الـ PIN بدل الباسوورد العادية أو عن طريق إستخدام صورة لتسجيل الدخول
10- بتستخدم OS قديم
تشغيل نظام تشغيل قديم علي لابتوب جديد مش بس مضر بيه، لأ كمان بيقيد إمكانيات الجهاز بشكل كبير لأن نظام التشغيل تم برمجته في عصر مكنتش التكنولوجيا في جهازك كانت متاحة وبالتالي من الأفضل التحديث لآخر نظام للإستفادة بأكبر شكل من إمكانيات جهازك
